Interview

Interview with Presidential Spokesperson Harry Roque by Henry Uri (DZRH – ACS Balita)

 

HENRY: Secretary, good morning. Si Henry Uri po.

SEC. ROQUE: Magandang umaga, Henry at magandang umaga po sa mga nakikinig at nakikiramay po tayo sa mga nasalanta po ng bagyong… kelan lang ay dumapo po sa Biliran, Samar at Leyte.

HENRY: Ito hong Urduja, ilan lahat ang nakarating sa inyo pong kaalaman na biktima po nito?

SEC. ROQUE: Naku, napakahirap po ngayong magsalita ano. Sa kasalukuyan po ay nakikipag-ugnayan po ang aking tanggapan para hindi naman po tayo magkamali dito. Pero samut-samot po ang mga report na nakukuha namin, ang suma tutal po ngayon niyan at bineverify po sa NDRMMC.

HENRY: Secretary iyong dahilan ng pagbaha doon sa Biliran, ano rin ang naka-abot na report sa inyo sa Malacañang?

SEC. ROQUE: Well ang narinig po namin na galing mismo sa PAGASA ay parang dalawang buwan ng ulan ang nakuha sa isang araw ng Biliran. At dahil dito po ay lumambot talaga iyong mga lupa, dahilan kung bakit napakadaming tulay na nasira at meron atang mga reports din ng mga landslide ‘no. So napakatindi lang po talaga ng ulan at sabi nga po ni Mayor Grace Casil na aking kausap, siya po ang Mayor ng Biliran, ay para daw pong tinatabo iyong ulan doon sa bilis kahapon.

HENRY: Sa pagtungo roon ng Pangulo, ano ang aasahan ng mga taga lalawigan ng Biliran?

SEC. ROQUE: Well, titingnan po ni Pangulo kung ano talaga ang pinakamatinding pangangailangan ng Biliran at para iparating na ang gobyerno ay karamay nila sa kanilang karanasan ngayon.

HENRY: Maliban sa Biliran, dadaan din daw ho ng Tacloban, sabi ni Secretary Manny Piñol ang ating Pangulo?

SEC. ROQUE: Tama po iyan at well, ngayon pa lang po ay kami po ay papunta na ng airport, mauna po kami doon sa ating Presidente. At sa tingin ko ay nag-a-asiste din sila doon sa mga airport na pupuwedeng puntahan ng ating mahal na Pangulo ngayon.

HENRY: And then after ng Biliran, babalik na ng Manila ang ating Presidente?

SEC. ROQUE: Opo. Meron din po kasing mga schedule mamaya na para sa mga kasundaluhan. Pero depende po talaga iyan kung anong oras matapos ang pag-iikot ng Presidente ngayon.

HENRY: Secretary, ang maskalap ho nito iyong mga magdadala daw ho—totoo ba iyon, iyong mga magdadala ng relief goods sa Samar na mga miyembro po ng AFP in-ambush naman ho ng NPA. Ano ang sabi ng Pangulo riyan?

SEC. ROQUE: Iyan po talaga ay hindi lang nakakalungkot, nakakagalit, iyan po ay talagang patunay na traydor po talaga ang CPP-NPA. Alam n’yo po sa batas ng labanan iyong tinatawag na International Humanitarian Law, kung ikaw ay sundalo, kapag ikaw naman ay gumagawa ng isang makataong bagay, humanitarian mission ay hindi po dapat inaatake, iyan po ay isang war crime na tinatawag. Pero iyan po talaga ang problema natin sa NPA, hindi po sila lumalaban sang-ayon sa batas na umiiral pagka ganoong labanan at sila po talaga ay hindi mapapagkakatiwalaan.

HENRY: Isa pa Secretary, sa talumpati ng Pangulo sa Davao, sa LGBT gathering, may binanggit siya na siya ay pabor sa same sex marriage. Ano po ang posibleng—well of course, may siguradong tataas ang kilay riyan at maaring magagalit sa sinabi ni Pangulo. Ngayon pa lamang ano po ang paliwanag po rito ng Palasyo?

SEC. ROQUE: Well, sa mula’t-mula naman po, ang Pangulo po ay naniniwala sa karapatan na magkaroon ng pantay-pantay o iyong rights equality ng mga mamamayan sa ilalim po ng ating batas. At iyan po ang ibig sabihin ng ating Presidente, pupuwedeng magkaroon ng civil union sa panig ng mga parehong kasarinlan, dahil iyong karapatan naman na pumiliin kung sino ang gusto mong ibigin ay isang karapatang pantao talaga na hindi dapat panghimasukan ng ating gobyerno.

So matagal na pong naninindigan sa karapatang equality ng ating Presidente, ito po ay patunay na naman sa kanyang paninindigan.

HENRY: Okay at ingat po kayo at good luck. May mga initially may dadalhin bang relief goods o may ayudang financial ba ang Pangulo sa inyong pagtulak sa Biliran at sa Tacloban?

SEC. ROQUE: Ay naku balewala naman ang pagpunta ng Pangulo doon kung wala siyang dadalhing tulong. Sa katunayan ako po ngayon ay nagtatanong kung anong klaseng eroplano ang sasakyan ko, mukhang C-130 po tayo ngayon, kauna-unahan kong sasakay ng C-130. [Laughs]

HENRY: [Laughs] Naku lupagay kayo riyan. Baka kasabay kayo ng mga kahong-kahong mga delata at mga relief packs diyan.

SEC. ROQUE: Tama po iyan, exciting po itong ating gagawin kauna-unahang pagkakataon.

HENRY: Sige at iyong ating press briefing mamaya sa Palasyo ay doon na daw ninyo gaganapin sa Biliran.

SEC. ROQUE: Opo, kaya nga po, sana makahanap tayo ng pagkakataon na magkaroon tayo ng video conferencing ngayong araw na ito at gagawan ko rin ng paraan; kung hindi tayo ay mag-facebook live na lang o kaya naman kaya ay iyong tinatawag na Viber ‘no.

HENRY: Oho, basta kami ay bahagihan na rin ninyo ng impormasyon kung ano’t ano man ang nangyayari sa Biliran from your end, Secretary.

SEC. ROQUE: Opo. Magsama-sama tayo mamaya by video conferencing ng alas-dose po galing sa Biliran.

HENRY: All right, Secretary maraming salamat, ingat po kayo. Have a safe flight.
####

 

Resource