Interview

Interview with Presidential Spokesperson Harry Roque by Erwin Tulfo (PTV 4 – Tutok Erwin Tulfo)

Event Media Interview

TULFO: Hindi ka ba napapagod, Secretary, sa ginagawa mo? Ako po’y nahihilo sa’yo, paroon, parine; check dito, check-up doon; kumusta na ang lagay ng ating bayan.

SEC. ROQUE: Malapit na po ang Pasko, puwede na tayong matulog nang mahaba. [laughs]

TULFO: Anyway Secretary, mayroon kasing kumakalat, ako’y napunta sa isang binyagan dito sa may Cavite kahapon. Lahat lumabas ng bahay nung malaman nandoon ako, tinatanong ako, sabing ganoon, “Sir, totoo ba ito, magla-lockdown daw? Eh lagi ninyo namang kausap iyong IATF’s spokesman – sabi ng kanilang homeowner’s association president – eh may lockdown daw, December 23 hanggang January 3. Eh totoo ho ba ito?” Secretary, pakipaliwanag nga, ano ba ito at fake news po ba ito?

SEC. ROQUE:  Fake na fake na news po iyan dahil ang classification po na inanunsiyo ng ating Pangulo noong kailan lamang ay para po sa isang buong buwan – sa buong buwan ng Disyembre. At nakasaad na po sa polisiya ng IATF na hindi na tayo babalik doon sa malawakang lockdown kung hindi magkakaroon lang tayo ng localized at saka granular lockdown dahil alam natin na talagang hardest hit na po iyong ating ekonomiya, iyong hanapbuhay natin ay talagang nagbabanta na po talaga itong COVID-19 na ito ‘no.

Kaya nga po ang patuloy na mensahe ng ating Presidente: Mask, hugas, iwas; Ingat-buhay para sa ating kabuhayan.  Fake news po iyang kumakalat na iyan.

TULFO:  Sir, do you think ito’y nanggagaling sa mga kalaban? Mukhang galit yata sa gobyerno ito’t gusto nilang mag-panic ang sambayanan.

SEC. ROQUE: Sigurado po akong kalaban ng gobyerno iyan kasi ginagalit nila iyong taumbayan; sisirain nila iyong Pasko natin ‘no. Pero sa tingin ko naman, itong nakalipas na pito hanggang walong buwan ay lahat naman tayo’y talagang nag-iingat para magkaroon din tayo ng Merry Christmas. Hindi po ordinaryong Christmas na ating sini-celebrate taun-taon, pero ganoon pa man, magiging maligayang Pasko pa rin ito na sinisira na pilit noong ating mga tinatawag na mga kalaban.

Iyan po ay—ano nga ba iyong tinatawag doon sa Christmas Story? Mga grouch, [laughs] mga grouch po iyan.

TULFO: All right. Sir, panghuli na lamang: Pupuwede na raw mga trainings, seminar? Pakipaliwanag at mayroon akong kamag-anak na mayroon siyang schooling daw so pupuwede na ho ba ito ngayon?

SEC. ROQUE: Iyong mga trainings po ay pinapayagan pero hanggang 30% lang po iyong kanilang maximum na pupuwedeng daluhan. So kapareho po iyan ng religious services, hanggang 30 porsiyento.

TULFO: All right, all right, malinaw. Naku, maraming salamat po, Secretary Harry Roque. Sir, please stay safe, sir, ha. Lakad kayo nang lakad, ang dami ninyong tsini-check-up na mga lugar pinagdarasal namin na sana naman ay bigyan pa kayo ng lakas ng katawan ng Panginoong Diyos at ilayo kayo sa sakit na COVID, Secretary.

SEC. ROQUE: Salamat, Pareng Erwin. Ganoon din sa’yo at kinakailangan pag-ingatan po natin ang ating mga sarili ng tayo po ay makapaghanapbuhay. Magandang umaga po.

 

###

 

SOURCE: PCOO-NIB News and Information Bureau-Data Processing Center