INTERVIEW OF COMMUNICATIONS SECRETARY HERMINIO COLOMA, JR.
DZRB / Balita at Panayam by Allan Allanigue
08 March 2016
ALAN: Secretary Coloma, sir. Magandang umaga po.

SEC. COLOMA: Magandang umaga, Alan.

ALAN: Yes, sir. Ano po ang latest dito sa mga hakbang para makontra itong Zika virus? Meron pong isang case na sinasabing Amerikana na sinasabing nag-positive sa Zika dito sa ating bansa, Sec. Sonny, sir.

SEC. COLOMA: Ang mahalagang isa-isip ng ating mga kababayan, Alan, ay iyong patuloy na pagiging alerto at pagiging maingat, patuloy na paglilinis sa mga kapaligiran na maaring pagbahayan ng mga lamok na panggagalingan nitong Zika virus at ng dengue, chikungunya at iba pang mga sakit. Iyan po ang mahalaga sa kasalukuyan, iyong pagiging maaalam at matatag tayo para mapanatili ang ating kalusugan. Iyan po ang dapat na tugon natin doon sa banta ng Zika virus.

ALAN: Opo. So importante pa rin, Sec., talagang ang pagme-maintain ng kalinisan ng immediate surroundings ng ating mga tahanan po ano.

SEC. COLOMA: Tama iyon, Alan. Dahil ang pinanggagalingan lang naman niyan ay iyong lamok; at iyong lamok na nagtataglay ng Zika virus ay nagbi-breed iyan, matatagpuan sa mga lugar na hindi malinis.

ALAN: Opo. Sa ibang usapin po, Secretary Coloma, sir. Meron pong sinasabing babala itong Moro Islamic Liberation Front at binabanggit nila na ito raw Islamic State terrorist group ay nagtatangkang mag-establish ng parang base dito raw po sa Southern Philippines partikular sa Mindanao. Ito po ay nire-relate nila doon sa kasunod ng hindi pagkakapasa hanggang sa kaslaukuyan ng Kongreso nito hong panukalang Bangsamoro Basic Law o BBL bilang bahagi po peace agreement sa Mindanao, Sec. Sonny, sir?

SEC. COLOMA: Kailangang malinaw ang ating pinagbabatayang prinsipyo, Alan. Unang-una, binibigyan po tayo ng katiyakan ng ating Sandatahang Lakas na hindi pa po nagkakaroon ng grupo ang ISIS dito sa ating bansa. Marami po kasing nagpapalathala o nag-aanunsyo sila daw ay kinatawan ng ISIS, sila daw ay kampi sa ISIS. Ang importante kasi dito, Alan, iyong hindi tayo maliligalig ng walang sapat na batayan. Kasi nga ang mga nakikita natin sa ngayon ay kilos ng hiwa-hiwalay na mga grupo na ayon na rin sa pag-analisa ng ating security sector tila nagsasamantala doon sa pagka-alam natin tungkol sa ISIS at ginagamit ito bilang dahilan para maghasik ng ligalig samantalang wala namang matibay na batayan. Ang sinabi ng ating kaibigan na tagapangulo ng MILF — si Ginoong Murad Ibrahim — ay ito… sinabi niya na iyong pagka-antala ng peace process ay maaring magdulot ng pagkabahala o frustration sa ating mga kapatid sa Kamindanaoan at sa Bangsamoro pero hindi dapat na gamitin itong pagkakataon at hindi dapat natin pahintulutan iyong mga elementong terorista na samantalahin ito.

Kaya dapat ay lalo pang pag-ibayuhin iyong pagtataguyod natin sa prosesong pangkapayapaan. Kasi iyong mga naghahasik ng lagim ay sinasamantala nila iyong pagkakaroon ng diskuntento o frustrations at logical lang naman iyan, hindi ba, Alan. Kinakailangan ay sa kabila ng alinlangan ay magkaroon tayo ng katatagan at ang katatagan ay iyong pagkakaroon ng posibilidad ng peace dividends, kung maitatag po natin ang katahimikan at kapayapaan lalo pong yayabong ang pagprogreso o pag-asenso natin. Iyan din ang mensahe ng JICA, na isa nating kaagapay ‘no, isang malaking donor ng Official Development Assistance. Naniniwala sila doon sa konsepto ng peace dividends — na ating na-accomplish na sa Bangsamoro sa pamamagitan ng pagkakaroon ng comprehensive agreement — ay lalo pa itong mapapalawak kung itataguyod pa natin iyong peace process at kung maipapasa na nga iyong Bangsamoro Basic Law.

So, ganoon dapat ang ating perspektibo, Alan, iyong maging lalo pang matatag iyong ating pagtataguyod sa prosesong pangkapayapaan at iyong hindi natin paghintulot sa mga naghahasik ng ligalig na mamayani sa ating bansa.

ALAN: Sa ngayon po kumusta ang pakiipagusap ng Malacañang with the various stakeholders, of course, tungkol pa rin dito sa layunin na magkaroon tayo ng lasting peace sa Mindanao, Sec. Sonny, sir?

SEC. COLOMA: Patuloy ang ating pakikipag-ugnayan sa iba’t-ibang stakeholders, tinutuloy natin iyong pakikipagdiyalogo, pinag-iigting natin iyong education and information campaign para lalo pang malinawan at lalo pang maintindihan ng ating mga kababayan itong mga prinsipyo na ating tinataguyod. Iyon kasing mga nasa kabilang panig, Alan, ang kanilang concentration ay iyong maghasik ng pagkakahati-hati. Palagi nilang sinasabi hindi daw kinunsulta itong grupong ito, iyong grupong ganoon. Pero malinaw naman ang record. Daan-daang consultation meetings at diyalogo na ang isinagawa ng iba’t-ibang organisasyon — ginawa ito ng Kongreso, ng OPAPP, ng mga civil society groups, iyon pong mga indigenous peoples na sakop din po niyan kasama din po sila sa ating proseso, iyon pong MNLF — na pinanggalingan nitong MILF — ay kasama rin po sila. Wala naman po tayong hinihiwalay o pinupuwera dito. Dahil ang mahalaga nga dito iyong pagkakabuklod-buklod, iyong pag-uugnayan ng lahat ng merong taya sa prosesong pangkapayapaan.

ALAN: Yes, sir. Okay. Sec, ngayon pong Marso ay buwan ng mga kababaihan. At ngayon pong a-otso, actually, since International Women’s Day baka meron po kayong espesyal na mensahe para sa ating mga kababaihan, Secretary Coloma, sir.

SEC. COLOMA: Kaya nga’t nung makalawa lamang ay ating ipinaalala na sa araw na ito — iyon ngang pagdiriwang ng International Women’s Day. At sa buong buwan naman ng Marso ay iyong International Women’s Month. At ang ating pagdiriwang ay sa pangunguna ng Philippine Commission for Women at nais nating itanghal iyong kahalagahan ng papel na ginagampanan ng kababaihan sa pag-unlad ng ating bansa; at iyong pagtataguyod din natin sa ‘gender equality’ — na magkaroon ng pantay na pagkakataon, pantay na partisipasyon ang kasarian na lalaki at babae. Hindi dapat magkaroon ng diskriminasyon, lalung-lalo na sa kababaihan; at masigasig din tayong nagkakampanya laban sa violence against women. Dahil hindi dapat po umiral ang karahasan laban sa ating mga ina, kapatid, tiya at mga kababaihan.

ALAN: Opo. Well Secretary Coloma, sir, muli salamat po ng marami for the updates from the Palace, sir.

SEC. COLOMA: Maraming salamat at magandang umaga, Alan.

SOURCE: Presidential News Desk